ସାଧନା କରୁ ପ୍ୟାରେ.....

(ସାଧନ-ଭକ୍ତି ତତ୍ତ୍ବ)

ସଂକୀର୍ତ୍ତନ ମାଧୁରୀ – ୧, ପୃଷ୍ଠା ସଂଖ୍ୟା – ୧୭୩/୧୬୩

ଶ୍ରୀ ମହାରାଜ ଜୀଙ୍କର ଆଦେଶ ଅନୁଯାୟୀ ସାଧନା କରିବା ପାଇଁ ଆଗ୍ରହୀ ପ୍ରତ୍ୟେକ ସାଧକ ଏହି ପଦ୍ୟ ଅନ୍ତର୍ଗତ ୫୪ଟି ପଂକ୍ତିକୁ କଣ୍ଠସ୍ଥ କରିନେବା ଅତ୍ୟାବଶ୍ୟକ ଅଟେ |

ସାଧନା କରୁ ସାଧନା କରୁ, ସାଧନା କରୁ ପ୍ୟାରେ |

ସାଧନା ତେ ହୀ ମିଲେ ତୋହିଁ, ସାଧ୍ୟ ହରି ରତି ପ୍ୟାରେ |

ପ୍ରିୟ ସାଧକ! ସାଧନା (ଭକ୍ତି ଅଭ୍ୟାସ) କରିବାକୁ ସଂକଳ୍ପବଦ୍ଧ ହୁଅ। କେବଳ ସାଧନା ହିଁ ତୁମକୁ ତୁମର ପରମ ଚରମ ଲକ୍ଷ୍ୟ, ଈଶ୍ୱର-ପ୍ରେମ ପ୍ରଦାନ କରିବ।

(ଯଦିଓ ଈଶ୍ବର-ପ୍ରେମ କୌଣସି ସାଧନାର ଫଳ ନୁହେଁ; ତାହା କୃପା-ସାଧ୍ୟ ଅଟେ, ତଥାପି ତାହାକୁ ପ୍ରାପ୍ତ କରିବା ନିମନ୍ତେ ସାଧନାର ଆବଶ୍ୟକତା ରହିଛି | ସାଧନା ଆମକୁ କୃପାର ଅଧିକାରୀତ୍ବ ପ୍ରଦାନ କରିଥାଏ | ଈଶ୍ବର-ପ୍ରେମ ଭଗବାନଙ୍କର ସର୍ବାନ୍ତରଙ୍ଗ ଶକ୍ତିର ନାମ ଅଟେ | ତାହାକୁ ଗ୍ରହଣ ଏବଂ ଧାରଣ କରିବା ନିମନ୍ତେ ଆମେ ନିଜର ଅନ୍ତଃକରଣ-ରୂପୀ ପାତ୍ରକୁ ଶୁଦ୍ଧ କରିବା ଆବଶ୍ୟକ ଯାହା କେବଳ ସାଧନା ଭକ୍ତି ବଳରେ ସମ୍ଭବ ହୋଇଥାଏ | ଶାସ୍ତ୍ର କହେ – ‘ତପଃ ପ୍ରଭାବାତ୍ ଦେବ ପ୍ରସାଦାଚ୍ଚ’ – ଲକ୍ଷ୍ୟ ପ୍ରାପ୍ତି ନିମନ୍ତେ ନିଜର ଉଦଯୋଗ ତଥା ଈଶ୍ବର-କୃପା ଉଭୟର ଆବଶ୍ୟକତା ରହିଛି | କୃପା କରିବା ଭଗବାନ ଏବଂ ଗୁରୁଙ୍କର କାର୍ୟ୍ୟ ଅଟେ | ଯାହା ଆମ ଦ୍ବାରା କରଣୀୟ ତାହା ସାଧନା ଭକ୍ତି ଅଟେ |)

ପ୍ରଥମ ଶ୍ରଦ୍ଧା ଯୁକ୍ତ ହୋ ଜା, ଶରଣ ଗୁରୁ ପଦ ପ୍ୟାରେ |

ଗୁରୁ କୀ ବୁଦ୍ଧି ମେଁ ଜୋଡ ନିଜ ବୁଦ୍ଧି, ହୈ ଶରଣ ୟହ ପ୍ୟାରେ |

ସାଧନାର ପ୍ରଥମ ପଦକ୍ଷେପ ହେଉଛି ବିଶ୍ୱାସ ଏବଂ ଶ୍ରଦ୍ଧାର ସହିତ ଗୁରୁଙ୍କ ଚରଣ କମଳର ଶରଣ ଗ୍ରହଣ କରିବା। ଗୁରୁ ଶରଣାଗତିର ଅର୍ଥ ହେଉଛି ଗୁରୁଙ୍କ ବୁଦ୍ଧି ନିକଟରେ ନିଜର ବୁଦ୍ଧିକୁ ସମର୍ପଣ କରିବା। ଅର୍ଥାତ୍ ନିଜ ସ୍ବତନ୍ତ୍ର ବୁଦ୍ଧିର ଉପଯୋଗ ନ କରି ଗୁରୁଦେବଙ୍କର ବିଚାର ଏବଂ ଉପଦେଶ ଅନୁସାରେ ନିଜକୁ ପରିଚାଳିତ କରିବା | (ଜଣେ ରୋଗୀ ଯେପରି ଡାକ୍ତରଙ୍କର ପରାମର୍ଶ ଅନୁଯାୟୀ ଚଳିଥାଏ |)

ତନ ସେ ମନ ସେ ଧନ ସେ ଗୁରୁ କୀ, କରହୁ ସେବା ପ୍ୟାରେ |

ବ୍ରହ୍ମ ମାୟା ଜୀବ କା କରୁ, ଜ୍ଞାନ ଗୁରୁ ସୋଁ ପ୍ୟାରେ |

ସେବ୍ୟ ସୋଁ ସମ୍ବନ୍ଧ ଅପନୋ, ଜାନୁ ଗୁରୁ ସୋଁ ପ୍ୟାରେ |

ଶରୀର, ମନ ଏବଂ ଧନ ଦ୍ବାରା ଗୁରୁଙ୍କର ସେବା କର। ଏହି ତିନି ପ୍ରକାରର ସେବା ମଧ୍ୟରୁ ଯଦିଓ ମନର ସେବା ସର୍ବୋପରି ଅଟେ, ତଥାପି ମନରେ ସେବା କରିବା ଦ୍ବାରା ଶରୀରରେ ଏବଂ ଧନରେ ସେବା ଆପେ ଆପେ ହୋଇଯାଏ | ମନରେ ସେବା କରିବା ଅର୍ଥ ମନର ଆସକ୍ତି ଗୁରୁଙ୍କ ପ୍ରତି ରଖିବା – ତାଙ୍କର ଇଚ୍ଛା ପୂରଣ କରିବା ନିମନ୍ତେ ତତ୍ପର ରହିବା, ତାଙ୍କର ସୁଖକୁ ନିଜ ସୁଖଠାରୁ ବଳି ପ୍ରାଧାନ୍ୟ ଦେବା | ସେଥିପାଇଁ ଶାରୀରିକ କଷ୍ଟ କରିବାକୁ ପଡିଲେ ଅଥବା ନିଜର ଉପାର୍ଜନ ଉତ୍ସର୍ଗ କରିବାକୁ ପଡିଲେ ମଧ୍ୟ ଆମେ ପଶ୍ଚାତ୍ପଦ ହେବା ନାହିଁ | ଏହା ସ୍ବତଃସିଦ୍ଧ ଅଟେ | (ଆମେ ଯାହାକୁ ଭଲ ପାଏ, ତା’ପାଇଁ ଆମେ ନିଜର ଶାରୀରିକ ସୁଖ ଏବଂ ଧନ-ସମ୍ପାଦ ତ୍ୟାଗ କରିବାକୁ ପ୍ରସ୍ତୁତ ରହିଥାଏ |)

ଗୁରୁଙ୍କଠାରୁ ବ୍ରହ୍ମ (ପରମେଶ୍ୱର), ମାୟା (ଭୌତିକ ଶକ୍ତି) ଏବଂ ଜୀବ (ବ୍ୟକ୍ତିଗତ ଆତ୍ମା) ସମ୍ବନ୍ଧୀୟ ତତ୍ତ୍ବଜ୍ଞାନ ପ୍ରାପ୍ତ କର। ଏତଦ୍ ବ୍ୟତୀତ ନିଜର ସେବ୍ୟ (ଭଗବାନ)ଙ୍କ ସହିତ ତୁମର ସମ୍ବନ୍ଧ କ’ଣ, ତାହା ମଧ୍ୟ ଗୁରୁଙ୍କଠାରୁ ଜାଣ । ମୁଁ କିଏ? ଭଗବାନ କିଏ? ମୋର ତାଙ୍କ ସହିତ ସମ୍ବନ୍ଧ କଣ? ମାୟା କଣ? ମୁଁ କାହିଁକି ମାୟାର କବଳିତ ହୋଇ ଏତେ ଦୁଃଖ-କଷ୍ଟ ଭୋଗ କରୁଛି? ମୋର କଲ୍ୟାଣ କିପରି ହେବ? ଏଥିପାଇଁ ଈଶ୍ବର-ପ୍ରାପ୍ତି କଣ ଏକାନ୍ତ ଆବଶ୍ୟକ? – ସାଧନାରେ ଅଗ୍ରଗତି କରିବା ନିମନ୍ତେ ଏହିସବୁ ଜ୍ଞାନ ପ୍ରାପ୍ତ କରିବା ଅତ୍ୟନ୍ତ ଜରୁରୀ ଏବଂ ଗୁରୁ ଆମକୁ ସେହି ତତ୍ତ୍ବଜ୍ଞାନ ପ୍ରଦାନ କରିବେ |

                                                                                                              କ୍ରମଶଃ .............................